1 Macc 11

b11.341 Mak. 10.30.

Mehlahn Aleksander Epipanihs

1 Nanmwarki Tolemi Kewenemen en Isip ketin kapokonepene karis ehu me inenen tohn mehlel sang pihk en ni oaroahr kan iangahki polohn sohp ehu. E song en kalowehdi Aleksander oh alehdi wehio oh kapatahiong sapwellime wehi. 2 E ahpw ketila Siria oh inoukihong irail meleilei, mehn Siria eri kasamwo ih pereperen. Nanmwarki Aleksander me ketin koasoandi duwen kasomw wet pwehki eh pwoudiki sapwellime serepein. 3 Ahpw ni Tolemi eh ketilahng paliepeng, e ketikihdi pwihnen sounpei kei nan kahnimw kan. 4 Ni eh ketin lel Asdod, tohn kahnimwo kasalehiong mohn tehnpas en Dakon me mwasikala iangahki kahnimw ko limwah, wasa me paliweren aramas mehla kan wonohn nanpwel oh sousou en me mehla nan mahweno oh pil koasoakoasoak en me mehla nanial akan me Tolemi keid ie. 5 Aramas ako padahkihong Tolemi soahng suwed koaros me Sonadan wiadahr ni koapworopworpen me Sonadan pahn pwukoahkidier mehkoaros, ahpw Tolemi sohte mwahn tehk irail. 6 Sonadan kohieila Sopa pwehn kasamwo Tolemi ni wahu en nanmwarki. Ira eri tuhpene oh rahnmwahupene oh pweiekidi Sopa. 7 Sonadan eri iangada nanmwarkio ketla lel Pillap Eluhderus mwohn eh pwuralahng Serusalem. 8 Iei duwen met Nanmwarki Tolemi, ni eh kupwukupwure widingehdi Aleksander, ketin kalowehdi kahnimw koaros en ni oaroahr lelahng Seluhsia paliepeng. 9 Nanmwarki Tolemi ahpw kadarasang wasao pakair ehu ong Nanmwarki Demihtrius me mahsanih: “Komw ketido kita en wiahda ehu inou nanpwungata; I pahn kihong komwi en pwoudiki nei serepein me pwoudiki Aleksander, komwi ahpw pahn pwurehng kaunda wehin omwi pahpa kahlap ako. 10 I koluhkilahr ei mweidohng Aleksander en pwoudiki nei serepeino pwehki eh kupwukupwure en ketikihsang ie ei mour.” 11 Tolemi wiahda kadip wet pwehki eh noahroke sapwellimen Aleksander wehi. 12 Ih eri adihasang Aleksander sapwellime serepeino oh ketikihong Demihtrius; e ahpw mweila sang Aleksander, ara imwintihti ahpw sansalda. 13 Tolemi ketilahng Andiok oh alehdi lengileng en Siria; e alehdier lengileng en Siria oh lengileng en Isip.

14 Nanmwarki Aleksander ketiket nan Silisia ni ahnsowo pwehki tohn wasao ar moromoradahr. 15 Ahpw ni eh karongehda dahme Tolemi wiadahr, e ahpw ketla pwe en mahweniong Tolemi. Tolemi pil kaunopadahr sapwellime karis kalaimwun ehu, ira tuhpene oh mahwenda oh Tolemi kalowehdi Aleksander. 16 Ni Tolemi eh kalowedier douluhl, Aleksander sopolahng Arepia pwehn ale sawas ie. 17 Ahpw mehn Arepia men ede Sapdiel lupukasang moangen Aleksander oh kadaralahng Tolemi. 18 Eri, rahn riau mwurin met, Tolemi pwoula, oh tohn kahnimw ko pil kemehla karis me e ketikidohng wasahn mahwen ko. 19 Eri, nan pahr 167 ^{▼▼ PAHR 167: Sounpar wet pahrekiong pahr 145 mwohn Krais.} Demihtrius Keriemen wiahla nanmwarki.

Sonadan Kenikenla pahn Demihtrius Keriemen

20 Ni ahnsowo Sonadan kapokonpene mehn Sudia kan pwe re en mahweniong wasahn mahwen me mi nan Serusalem. Re wiahda pasapas en mahwen tohto. 21 Ahpw mehn Suhs suwed kei me kin kailongki pein ar wehi ahpw kohla oh kairehki Nanmwarki Demihtrius Keriemen me Sonadan koasoakoasoane en mahweniong wasahn mahwen en Serusalem. 22 Ni Demihtrius eh karongehda met, e inenen engiengda oh mwadangete kamwakidalahng eh impwal kan nan Tolemais. Ih eri ntingkilahng Sonadan en katokihedi mahweno oh mwadang kohla reh nan Tolemais pwe ira en wiekupwur ie.

23 Ni Sonadan eh rongada met, e koasoanehdi pwe mahweno en pweidahte, oh pilada kaunen mehn Suhs kei oh samworo kei pwe re en iang ih kohla rehn Demihtrius. Ni keper laud, 24 e ahpw kohla rehn nanmwarkio nan Tolemais, e wahda likou reirei kei, kohl, silper, oh mehn kisakis kei. E ahpw kameleileidi nanmwarkio. 25 Mehn Suhs suwed ko pil pwurehng kedipahki Sonadan sapwung tohto, 26 ahpw nanmwarkio sohte ketin tehk irail, pwehki eh kawauwihalahr oh ketikihongehr mwohn sapwellime sounkaweid ko lengileng laud ehu duwehte me nanmwarkien mwowe ko ketikihong, 27 oh ketin kamanahla sapahl nan dewen Samworo Lapalap oh kapwurehiong nan wahu me e ahneki mahs oh aleier lengileng keieu laud nanpwungen irail kan me mwarenki “Kompoakepahn Nanmwarki.”

28 Sonadan eri peki rehn nanmwarkio en kasaledeksang mehn Sudia oh sahpw siluh en Sameria pwukoahn pwain daksis, oh inoukihda ma Demihtrius pahn kapwaiada, e pahn pwainkihong uwen mwohni silper paun 22,000. 29 Nanmwarkio eri kupwure eh pekipeko, e ahpw ketikihong Sonadan kisinlikoun kadehde duwen ire pwukat. Iet audepen kisinlikowo: 30 “Rahnmwahu sang Nanmwarki Demihtrius ong Nanmwarki Sonadan, oh ong wehin Sudia.

31 “I kadarowohng komwi pelien kisinlikou kiset pwe kumwail en mwangih me I kadaralahng Lastenihs kisehn at peneinei duwen kumwail:

32 “‘Rahnmwahu sang Nanmwarki Demihtrius ong eh pahpa Lastenihs. 33 I koasoanedier I en wiahiong kamwahu kei ong mehn Sudia kan pwehki ar wia kompoakepahtail loaloapwoat oh pwehki ar dadaurete ar inou en miniminiong kitail. 34 I kamanalahr ar pwung en sapweniki Sudia oh sahpw siluh en Epraim, Lidda, oh Arimadea, nan Sameria. Eri, wasa pwukat keseusangehr nan Sameria oh ehuongehr Sudia. Met pwehn wia kamwahu ehu ong koaros me kin kohla wia meirong Serusalem, daksis me nanmwarki kin ale sang rehrail nan sounpar koaros sang ni wahnpwehl oh wahntuhke solahr pahn kohieng nanmwarki, ahpw e pahn uhd kohieng ni Tehnpas Sarawio. ^b 35 Oh sang rahnwet kohla I mweidohngehr irail en dehr kihong ie arail daksis en eisek kis ehun wahntuhke, wahnpwehl, daksis en soahl, oh soangen daksis teikan. 36 Sohte ehu koasoandi me sansalehr nan kisinlikou kiset pahn wekidekla kohkohlahte.

37 “Ih omwi pwukoahn met, komwi en wiahda pelien kisinlikou en kadehde koasoandi wet oh patohwanohng Sonadan pwehn langadahng wasa sansal ni dohl sarawio.’”

Sonadan Sewese Demihtrius Keriemen

38 Ni ahnsou me Demihtrius mahsaniher me sapwellime wehi me meleilei oh sohte me kin uhwong, e ahpw ketin kadarpeseng sapwellime sounpei koaros en pwuralahng ni imwarail kan, ihte sounpei kan me e ketikihsang ni deke kan en Krihs me mihmihte. Met kahrehda sounpei ko me kin doadoahk ni mwehin nanmwarkien mwowe ko ar mwakarada oh kailongkihla, pwehki eh solahr wasahn ar kapedolong mwohni. 39 Ohl emen ede Tripo, me kin iang utung Aleksander mahs, ahpw esehda duwen sounpei ko ar lipilipahnede Demihtrius, e ahpw kohla rehn Imalkue, ohl en Arepia me pwukoahki apwalihada nein Aleksander kisin pwutak, me adaneki Antaiokus. 40 Tripo ahpw mihmi wasao ahnsou reirei koangkoangngoangehki Imalkue en kihong kisin pwutako, pwehn kasapwilada wiliepen semeo. E pil koasoiaiong Imalkue duwen en Demihtrius eh koasoandio oh duwen sounpei kan ar kailongkilahr.

41 Sonadan ahpw kadaralahng rehn Nanmwarki Demihtrius meninkeder kei pwe re en peki reh en kamwakidasang sapwellime sounpei kan me mihmi nan kelen mahwen en Serusalem, oh wasa kan nan Sudia, pwehki ar kahkahpwalihete mehn Suhs kan. 42 Demihtrius ahpw sapengki, “I pahn kapwaiada omwi pekipeken, oh ni eh pahn mie ahnsou mwahu, I pahn kawauwihkomwihla oh omwi wehi. 43 Ahpw met komw kak sewese ie oh kadarodo ekei sounpei kan pwe re en iang ie mahwen, pwe nei sounpei koaros tangehrdoaui.”

44 Sonadan eri kadarala sounpei pilipil 3,000 nan Andiok. Nanmwarkio eri inenen kupwurperenkihda ar leledo, 45 pwe tohn kahnimwo oh iangahki aramas 120,000 pokonpenehr nanwerengen kahnimwo, onopadahng kemehla ih. 46 Ahpw e ketin rukula nan tehnpeseo, nindokon tohn kahnnimwo ar mwekimwekidseli nanial akan en kahnimwo oh tapihadahr moromor. 47 Nanmwarkio ahpw malipe sounpei en Suhs ko pwe re en sewese, irail koaros eri tangala sewesehda oh kohpeseng nan kahnimwo oh kemehla aramas 100,000. 48 Re doarehla mour en nanmwarkio, re ahpw pil kulihasang kepwe tohto oh isikala kahnimwo. 49 Ni ahnsou me aramas ako kilangada duwen mehn Suhs ko ar kalowedier kahnimwo, re nan kapehd tikitikla oh weriwerkihong nanmwarkio, pekipeki 50 en kameleileidi wasa oh katokihedi en mehn Suhs kan ar mahwen. 51 Irail ko me uhwongada nanmwarkio ahpw pwilikihdi ar tehtehn mahwen kan oh peki mahk. Nanmwarkio oh koaros nan wehi ahpw waunekihla mehlel mehn Suhs kan, re pwurala nan Serusalem wa kiden kepwe lohdi nan mahwen. 52 Demihtrius eri ketikette nan mwoalen nanmwarki, oh wehio pwurehng meleileidi ni ahnsou me e kakaun. 53 Ahpw e kauwehla eh inou koaros oh uhwongada Sonadan. E sohte kasapahlkalahngkihong eh wiewia mwahu kan, ahpw e uselahte kahkahpwalih.

Sonadan Utung Antaiokus Kewenemen

54 Ahnsou kis mwurin mepwukat, Tripo pwurodo wa kisin pwutak Antaiokus oh kasapwiladahng en nanmwarki. 55 Sounpei koaros me Demihtrius kihsang nan ar doadoahk ahpw kohla utung nanmwarki pwulopwulo. Re kalowehdi Demihtrius, ih eri tangdoaui. 56 Tripo eri poarokedi elepant ko oh kalowehdi Andiok. 57 Nanmwarki pwulopwul Antaiokus ahpw ntinglahng Sonadan oh pwurehng kamanahla nan dewen Samworo Lapalap oh dewen kakaun sahpw pahieuo oh lengileng en “Kompoakepahn Nanmwarki.” 58 E pil kadaralahng kep kohl kei oh mahsanihong me e ahneki pwung en doadoahngki kep kohl kan oh likawih likoun soupeidi, oh kapwatki mehn kateng kohl me kin kohiengete irail kan me mwarenki “Kisehn Nanmwarki.” 59 E pil ketin idihada Saimon, rien Sonadan, pwehn wiahla kepina en sahpw akan sang Dair lel irepen Isip.

60 Sonadan eri mwekidla kotehla kahnimw kan en Siria Lapalap, oh sounpei en Siria ko pwonte iangala. E ahpw pil lel Askelon, wasa me tohn kahnimw ko kasamwo ni wahu mehlel. 61 Mwuhr, e ahpw mwesel kolahng Kasa, tohn kahnimwo ahpw ritingidihsang ar ewen kehl kan. Ih eri mahweniong kahnimwo oh isikala oh wahsang kepwe kan en kahnimwo. 62 Mehn Kasa ko eri peki mahk reh. Ih eri mahkohng irail. E ahpw wahsang nein me lapalap akan nair pwutak kan oh kadaralahng Serusalem pwe re en mihmi pahn eh manaman. Mwurin mwo, e pil mwekidla lellahng Damaskus.

63 Sonadan eri rongada me sapwellimen Demihtrius lapalap akan kohla Kedes nan Kalili iangahki lapalahn karis ehu, re songosong en irehdi eh koasoandio. 64 E kihdi rie Saimon nan Sudia, e ahpw mweselda kolahng mahweniong irail. 65 Saimon eri mahmahweniong Pedsur ahnsou reirei. 66 Aramas ako eri peki mahk reh, Saimon eri pwungki. Ih eri alehdi kahnimwo, kausasang towe kan, oh kihdiong sounpei kei wasa.

67 Sonadan oh nah kariso ahpw kauwada ar impwal kan limwahn Lehen Kalili. Manda nimensehngie, e ahpw wahda nah kariso oh mwekidlahng nan patapat en Asor, 68 wasa me karis en mehn liki ko mwekimwekidlahng ie pwe re en tuhpene ie. Sonadan sasairki me re kihdo pwihnen sounpei ehu pwe re en rukihedi pohn nahna kan, 69 oh ni ahnsou me sounpei me rukuruk ko pwarada pwe re en peiong, 70 nein Sonadan sounpei ko pweieklahte tangdoaui. Lapalapte riemen me luhwe, iei Madadaias, nein Apsalom, oh Sudas, nein Kalpi. 71 Sonadan eri inenen sarohdi, ih eri tehrpeseng eh likou kan, oh kidahng pehs pohn moange, oh kapakap. 72 E ahpw pwuralahng nan mahweno, mahweniong imwintihti ko, oh katangairailpeseng. 73 Ni nah sounpei me tangasang ko ar kilangada met, re ahpw pwurala iang ih pwakihala imwintihti ko. Re pwakihirailla lel ni ar kahnimpwalo me mi Kedes oh kalowehdi kahnimpwalo. 74 Rahno imwintihti kereniong 3,000 me mehla. Sonadan eri pwuralahng Serusalem.